Ante a publicación no DOG do sábado pasado dalgunhas das condicións sanitarias para a apertura dos parques infantís, o concello do Carballiño informa que os abrirá cando se poidan garantir estas condicións sanitarias, e tendo sempre en conta a preponderancia da normativa relativa ao aforo, desinfección e dispensadores de xeles hidroalcohólicos ou desinfectantes con actividade viricida, sobre calquera outra consideración que puidese poñer en perigo a seguridade dos nenos e nenas e das súas familias fronte ao coronavirus.

Así, o concello anuncia que a apertura se realizará unha vez que se poidan asumir todas as esixencias especificadas para este tipo de instalacións, pois é preciso delimitar e controlar o aforo permitido (unha persoa por cada catro metros cadrados de espazo), así como desinfectar cada día (unha desinfección diaria dos xogos e o espazo) e contar con dispensadores de xeles hidroalcohólicos ou desinfectantes con actividade viricida (ou dunha solución jabonosa no caso de espazos para menores de dous anos de idade).

Todo isto supón, ademais dun problema de organización, uno custo importante, que é preciso valorar e contratar, pois non pode ser asumido directamente por persoal do concello, nin se pode levar a cabo dun día para outro, e hai que facelo cumprindo estritamente os procedementos de contratación das administracións públicas, como é o caso dun concello.

En todo caso, o concello traballa na avaliación destas medidas co obxectivo de que se poidan abrir os parques infantís cando haxa a seguridade do seu cumprimento.